За вѣру и отечество

31.08.2015 22:22

 

На давном планѣ Уг обходит замкову гору з юга, а Малый Уг – з сѣвера, под гору Калвария

Котрый житель Будапешта не знав бы остров Моргиты (Маргареты) в своем красном го­ро­дѣ? Але ци жителѣ Ужгорода знают, же и у них быв такый остров до середины 1930‑х? А щи много иншого не знают з того, что в своей историчной миниатурѣ споминать автор. 

 

Перед дасколько мѣсяцями в Унгварѣ при кана­ли­зациѣ водовода на островѣ Мар­гареты,* в глубинѣ трьох метров, найшли роботники едну мѣдяну печатку. Сеся осем­углова печатка образуе мадярского «Турула», котрый в правой нозѣ держить ма­дяр­ский державный герб, а в лѣвой нозѣ держить еден другий герб с бук­вами: A–Z. Над титулом красно, чисто зарыто с цер­ковными буквами гасло: За вѣру и отечество, – а под титулом то самое гасло по мадярски: Hítért és honért.

Чия была ся печатка, яку цѣль служила, не зна­еме. Лиш предполагати можеме, что происходить из до­бы обновленя мадярского языка, вѣроятно из «Кошу­то­вой вой­ны». В 1848. року, коли Мадярщина хотѣла стря­сти австрийское ярмо, на подобу поль­ской легиѣ, зачала ся организовати и угро-руська легия, котра мала коо­пе­ровати с мадярским войском. Вѣроятно, высше­по­мянута печатка была власностею сей угро-русь­кой легиѣ.

О сей легиѣ не много знаеме. Была придѣлена к ди­визиѣ генерала Казинция. Пра­пор сей Казинциовой ди­ви­зиѣ торжественно благословив сам епископ Василий По­по­вич. Недавно по 99‑рочной жизни в Хоньковцях умер Иоанн Кимак, пен­зи­о­но­ва­ный збегньовский пѣвцо­учитель, и он многораз розказовав менѣ о сей архи­ерей­ской службѣ, на котрой як малый школярь быв присутный в Вадашкертѣ.

Мы, Русины, як найвѣрнѣйший народ, участ­во­вали и в Кошутовой осво­бо­ди­телной войнѣ. Нашѣ бого­словы в 1848. року сложили реверенду, облекли ся в гон­ведский мундур и вѣрно и ревно войовали за вѣру и оте­чество, за свободу в мадярских отрядах. Извѣстнѣ и по­еднѣ офицеры. Великана Бачинского в Дебрецинѣ сам губернатор Кошут похвалив за хороброе поведеня. Анд­рейкович же, в якости канонира вызначив ся в битвѣ с Москалями при Подгерингу.* Переданя говорить, что рос­сийский генерал Бубна* от его канона быв застрѣ­леный. На Теодора Дудин­ского, зарѣчовского пароха, еще и мно­гѣ живо памятаеме. Також быв отличен орде­ном за хо­роб­рое поведеня. Слава их памяти!

------
Бубна = чешскый баронскый и грофскый род, з котрого многы служили в австрийском войску.
Остров Маргареты (в Унгварѣ) = территория межи Угом и Малым Угом. В верхной части острова быв замок, а в нижной – млин.
Подгеринг (мад. Podhering) = Подгоряны, днесь часть Мукачова на выѣздѣ до Свалявы.  

Нова Недѣля, 2. юлия 1939, с. 3.

Koнтакт

Русинська Веб-книга +380.992646750 aruwega@gmail.com