Подземный цынтарь катедралной церкви

31.08.2015 22:15

Катедралный храм на замковой горѣ в Ужгородѣ став ся уже визитнов картков Ужго­ро­да, але что есть в глубинѣ скалы, на котрой стоит храм? Курто и популарно давать знати далша исторична миниатура Иренея Кондратовича.

 

На краю горбка бывшого унгварского замка сто­ить наша великолѣпна епи­скоп­ска церков. Не старша 150 роков. Была монастырскою церквою езуитов. По вы­гна­­ню чина езуитов была дарована царицею Мариею Тере­зи­ею в 1776 р. Мука­чов­скому епископству. Под тою церк­вою есть импозантна велика крипта, подземный цын­тарь мукачевских епископов и капитулы. Тут мертвѣ розтво­рять очѣ живых. Тут похо­ронена една часть новѣйшой угро-руськой историѣ. Владыки и каноники воз­рож­да­ю­чого ся народа тут спочивають в вѣчном по­кою. Интра­нзигентнѣ* нацио­на­лис­ты с твердыми Мадярами в мирѣ и покою ждають на общое воскресеня.

Вход до сего подземного цынтаря есть взадѣ катедралного храма, из малого, но приемного двора епис­копской палаты. 18 узкѣ ступнѣ ведуть нас до крипты. Над дверми есть вымальованный красный образ нашого академичного маляря Бокшая: Вос­кре­сение Иисуса Хрис­та, с утѣшителным надписом: «Азъ есмъ воскресение и животъ, вѣруяй въ мня, аще и умретъ, оживетъ». Воис­тину, к мѣсту отповѣднѣ слова, утѣ­­шаючѣ вѣруючих.

Внѣшна свѣтлость помалы лишить нас, и мы стоиме на едном широком бето­но­вом партерѣ. Налѣво и направо уже гробы, лѣпше кажучи, пещеры давно усопших вельмож. При будованю катедралного храма горкою бѣдою порохом вырыли в сил­ной гранитовой скалѣ 6 пещер и до сих были похоронены монахи езу­итов. Позд­нѣй­ше от 1775. рока, коли катедралный храм быв переданый мукачевскому епископу Ба­чин­­скому, бы­ли созданы и другѣ гробы–пещеры и по потребности все новѣ и новѣ при­будовали ся к старым.

С удивленьем и с доятым сердцем читаеме ла­тинскѣ и руськѣ надписи над пе­ще­рами тут похованых церковных вельмож. Тут упочивае «Installator»* епископ Анд­­рей Бачинский со своим штабом, с першими кано­ни­ками и со своим викарием ти­туларным епископом Бра­дачом. Недалеко лежить от него епископ Повчий. Добро­душный, благий чоловѣк, но епископ без енергиѣ. Все во­йовав со своим придворным духовенством и с капиту­лою. Еще и по смерти не мав чести, похоронен быв прос­то absque concione et nullas habuit solemnes exequias.* В том рядѣ, межи церковными дигнитарями, лежить и еден цивилный пан, поджупан ужанской столицѣ со сво­ею супругою. Яким способом досталися сюда, не из­вѣстно.

Дальше идучи находиме еден малый, камѣнный, но неукрашеный, пустый олтарик.

От сего налѣво и направо зачинають ся новѣйшѣ пещеры–гробы. Налѣво най­де­ме гроб недавно усопшого епископа «миссионаря»: Петра Гебея, обнятого со свои­ми на­й­милѣйшими сотрудниками, с канониками: Сабов, Шу­­ба и Карцуб. Тут спо­чи­вае золотое сердце му­дрос­тею, ученостею и скромностею. От камѣнного олтарика на­право под двома каменными крестами лежать два езу­иты. Дале епископы: своему народу все вѣрный Попо­вич и силный мадяризатор Панкович. Слѣдуе довгий ряд про­то­иерейов: Чурговича, Рошковича, Яковича, Ге­бея, Фейера, Матяцка и других усоп­ших каноников. Ряд заключить ся с перед роком усопшим протоиереем: Васи­ли­ем Гаджегою. Двѣ порожнѣ пещеры ждають на своих бу­дучих обывательов.

Интересантно, что из новѣйших епископов двое не похоронены в криптѣ. Епи­скоп Иоанн Пастелѣй по­хороненый в Мараморошсиготѣ, епископ Фирцак же в гроб­цѣ, составленной на унгварском замковом цын­тарѣ. Тут спочивае и напослѣдок усоп­ший протоиерей Юлий Станкай, котрый еще в животѣ выразив, что не хоче бы­ти похороненный в пещерѣ катедралного храма.

Блаженный их покой и память их вѣчная!

------
absque concione et nullas habuit solemnes exequias (лат.) = без одпроводных слов и жалобной процессии
installator (нѣм.) = закладатель, основатель
интранзигентный = коравый, непоправный, пересвѣдченый

Нова Недѣля, 6 августа 1939. 4

Koнтакт

Русинська Веб-книга +380.992646750 aruwega@gmail.com