Пару слов о дрессѣ

13.11.2013 17:16

Коли наша прародительниця Ева засмаковала заказаного овочу, сей час познала, что то стыд и ганьба и захотѣла од своего мужа дресса.* Прародитель Адам поскребтал свою волосату голову, бо пейды** еще не было и урвал из дерева листок, тай прикрыл стыдливу частину тѣла своей жены. Тот листок то был первый дресс на свѣтѣ. Историкы дресса еще не погодили ся, из якого дерева тот первый листок, хочу сказати дресс, был. Едны говорят, же то был фиговый листок, другы, же из гестини, трети говорят, же банановый листок…

Але Ева заледво день походила в первом дрессѣ. На другый день зачала кричати за другым дрессом, на третый – за третым, а потом уже два разы дня хотѣла нового дресса и то все из нового дерева. Бѣдный Адам гледал по лѣсах, ранил ногы и рукы по тернинѣ, пот из него цюрком текл, а каждый день новый листок мусѣл быти, бо иначе несчастлива ему година. Что за несчастлива година ему была, то каждый муж знае.

Раз Адам, в мѣсяци маю, коли то цѣла природа одѣвае ся в цвѣты, коли кажде деревце, каждый листочок, кажда травка шепчут о любви, урвал лис­точок з цвѣточком и принесл Евѣ на дресс. То так Евѣ полюбило ся, аж уже не хотѣла голого листка, лем з цвѣточком и то каждый раз другого колору. Як дол­го был май, то невелика штука найти, але коли пришол децембер, то несчаст­лива година для Адама была! Де ж ту цвѣтка взяти?! Флориды не было.

Такы клопоты з дрессами мал наш прародич Адам. И уж сам Адам, а по­том его мужскы потомкы зачали придумовати, як бы то догодити своим женам дрессами и придумали моду и пейду. Без пейды и мода быти не може. Од Еви­ного листка дошла мода до долгого дресса Марии Магдалины, котрый за нев волочил ся далеко по земли. Потом мода зачала идти нашироко в середных вѣ­ках и до сего дня остала в Шаришу и Земплинѣ. Там баба мусит надѣти на себе 24 сподници найменше.

Найновша мода в Америцѣ наближуе ся уже до найстаршой моды. При­крывают лем дуже стыдливу часть тѣла, як прародительниця наша Ева. Але дресс далеко меншого клопоту стоит, як нашого прародителя Адама. Вшытко есть готове. Над дрессами, над модов не мусит муж голову сушити. Муж мае принести лем пейду и оддати женѣ.

А коли бы часом не робил, або пейду до дому не донесл, то коли жена до дачого, то и так без свѣжого дресса ходити не буде. Купит бордер,*** або со­сѣд, або кум. Для Адама была бѣда, бо был лем сам и пейды не было...

Легше теперь, як было даколи.

--------
*дресс =платя;
**пейда =платня;
***бордер =квартелеш.

 

Жерело: Смѣхъ и Правда.
Календарь Ваня Гунянкы на годъ 1928.
New York – Passaic. 1927.
Мальба: Кранах Лукас Старшый, 1531

Koнтакт

Русинська Веб-книга +380.992646750 aruwega@gmail.com