МАЙСКИ ВОЗДУХ – МАЙСКЫЙ ВОЗДУХ

12.04.2014 20:33

Звонимиру быв суженый лем дуже куртый живот. Доля осановала го перед страшным уда­ром NATO, «гума­ни­тарным розгромом», што незадовго постиг его отцюзнину. Но уже по­слѣд­ны рокы свого живота его учулена душа дусила ся у пазурях «нового свѣтового по­ряд­ка», што стискали его малу отцюзнину. И уже лем мы, котры сьме ся пак могли стати свѣд­ками сего «нового порядка», могли сьме видѣти и чудовати ся тому безмѣрному поетичному пе­ред­чутю бѣды, што вызарюе з поетовых слов. Образы чистой природы и молодости в би­ю­чом контрастѣ из гнусныма слѣдами людской мерзнѣ усилюют свѣдченя часу и не­на­врат­ной утраты, майстерно пе­ре­даное автором. 

МАЙСКИ ВОЗДУХ

Як крашнє удиховац майски воздух.
Конєчно сом ше вимодлєл за дижджи.
Припатрам ше на калдерму.
Начали ю танки
хтори єдней ноци пришли до валалу.
Каждей соботи єст по два свадзби.
Докля будзе пенєжи?
Дзивчатка вечарами прекрашнє
 поприберани.
Я ище леґинь.
Пачи ше ми єдна
шеснацрочна дзивка.
Карчми полни зоз войском.
Гей, заври очка свойо,
спокойно, мирно шпи.
Добре же ше змерка
 двацетому вику.
Нєбо наисце белавеє.
Трави желєнши як слунко.
Кральовски зарюю блїщацосц.
Я кажди дзень шведок
же постої нєприродна борба
медзи духовносцу и допитосцу.
Не далєко и страх.
Душо моя, одпочинь ше дакус
на цихим беґелю.
Лапай рибки або очи заджмур.
Чекай музу хтора облєче писню
до младого чудованя.

МАЙСКЫЙ ВОЗДУХ

Як файно дыхати майскый воздух.
Наконець дал нам Бог дождю.
Позирам на возовку.
Зрыта танками,
што едну ноч зашли до села.
Кажду суботу двѣ свадьбы.
Доколь застане грошей?
Дѣвочкы навечер прекрасно
поприбераны.
Я щи легинь.
Любит ся ми една
шѣстнадцятьрочна дѣвка.
По корчмах полно войска.
Гей, стули очка свои,
спокойно, мирно спи.
Добрѣ, же ся змерькат
двадцятому вѣку.
Небо наистѣ бѣлавѣе.
Травы зеленшы од сонця.
Блищат ся так кралевско.
Я каждый день свѣдок,
же з нами неприродна борьба
межи духовностев и мерзнев.
Не далеко и страх.
Душо моя, спочинь си дакус
над тихым каналом.
Имляй рыбкы, або очи зажмурь.
Чекай музу, што ти стих облече
до молодого восторга.

Жерело: Русински/руски писнї.Нови Сад, 1997. 231.

Koнтакт

Русинська Веб-книга +380.992646750 aruwega@gmail.com